樂 - 新聞人物

呢幾日睇蘋果新聞, 見到班新聞人物, 真係為之側目.

昨日蘋果動新聞報導丁子高為準備同楊千嬅追龍B, 親口自爆食緊冬虫夏草補身; 兼有鑽研做愛體位, 增加懷孕機會. 當楊千嬅由結婚開始曬幸福(新婚果期相信好多人戥佢開心過!)曬到婚姻以外近乎無話題的地步, 及至佢老公看來好ENJOY做新聞人物一有SHOW就有料爆(又唔出奇0既, 話晒出過唱片紅唔起....), 令人反思原來羨慕過的婚姻分分鐘更似商業勾檔.

不知道此對伉儷何時搞網上投票, 問FANS最想兩公婆爆咩料? 本人認為, 既然兩公婆咁喜歡分享個人生活到如此地步, 唔爭在行多一步, 可不可以'拉闊動房'? 等公眾全情參與佢地做龍B的過程?

再睇埋唐英年同老婆大晒恩愛.......... 女人真係唔易做! 唐英年被爆有婚外情, 唔到佢唔認. 結果, 呢排好勤力, 拖住太太的手仔出來行街, 影相. 不過算啦, 如果老公在外有婚外情, 仲懷疑有私生子的情況下, 我諗太太都睇得好化, 當打份工咁做. 分分鐘, 近期做多少少, 有機會加薪, 出BONUS, 仲有更多強勁OUTING SPONSORSHIP.

今日又睇到王菲shopping, 王菲俾記者撞到黑口黑面, 已經不是新鮮事. 人地目標明確 - shopping唔接受訪問, 純綷私人節目, 你滋擾人黑面, 正常. 但係, 嘩! 睇到那班自由行嗎? 好討厭呀, 佢地刻意走過王菲身邊, 舉高手作SAY HI狀. 站在對面的友人同刻按快門拍照.......唉.......尊重下人地啦! 前幾天Mr.Tai在西鐵目睹疑似新移民在車廂即場為小朋友除褲放大放小, 幾咁豪邁.....  必須講, 好多好好的香港人, 都曾經係新移民, 所以唔應該歧視'新移民', 但新移民當中的某些人的作為, 實在太過份啦! 有無高質素新移民教導下佢地, 等佢地快啲適應香港的生活, 好好地做個香港人呢?